ئەمرۆ رێکەوتی ٦-٦-٢٠٢٣ رۆژی سێشەممە بە ئامادەبوونی چەند بەرپرسێکی حكومی و حزبی و میوانان و قوتابیان و خانەوادەی قوتابیان و مامۆستایانی بەرێز مەراسیمی وێنەگرتن و ئاهەنگی (شەشەم) ین خولی دەرچوانی قوتابیانی قۆناغی پێنجەم بەرێوەچوو ، سەرەتای مەراسیمەکە بە سرودی ئەی رەقیب و دەقیقەیەک وەستان بۆ گیانی پاکی شەهیدان سەروەریان بارزانی نەمر و کاکە ئیدریسی هەمیشە لەیاد دەستیپێکرد ، دواتر بەرێز مامۆستا (زیاد محمد) بەرێوەبەری دامەزراوەی (ئاگا) پەروەردەیی ووتەیەکی پێشکەشکرد و بەخێرهاتنی میوانە بەڕێزەکانی کردو پیرۆزبایی لە قوتابیانی دەرچوو کرد و تیشکی خستە سەر گرنگی بواری بەکارهێنانی تەکنەلۆژیای سەردەم و زانستی کۆمپیوتەر، هیوای سەرکەوتنی بۆ گشت قوتابیانی دەرچوو خواست ، دواتر مەراسیمی هاتنە ژوورەوەی قوتابیانی قۆناغی پێنجەم یەکە بە یەکە بۆ ناو گۆڕەپانی ئاهەنگە دەستیپێکرد و دواتر ئاهەنگەکە بە شایی و هەڵپەرکێ بەردەوام بوو دواتر سوپاسگوزاری قوتابیان بۆ بەرێوەبەری دامەزراوەی (ئاگا) و مامۆستایان پێشکەشکرا.
ئێمەش بەناوی بەرێوەبەەی دامەزراوەی (ئاگا) ی پەروەردەیی و دەستەی کارگێری و مامۆستایان و فەرمانبەرانی پەیمانگەکەمان خۆشحاڵین و گەرمترین پیرۆزبایی خۆمان ئاراستەی سەرجەم قوتابیان دەکەین کە ئەمساڵ لە پەیمانگەکەمان دەرچوون بۆ ساڵی خوێندنی ٢٠٢٢-٢٠٢٣ . ماندووبوون و خۆبەخشی و کۆڵنەدانتان سوودی هەبووە و شانازی بە دەستکەوتەکانتانەوە دەکەین.
دەرچوون لە پەیمانگە بڕگەیەکی گرنگە لە ژیانتاندا، و سەرەتای لاپەڕەیەکی نوێیە. زانیاری و لێهاتوویی و ئەزموونتان بەدەستهێناوە کە لە هەوڵەکانی داهاتوودا خزمەتێکی باش دەکات لە دەڤەرەکەمان. هیوادارین ئەوەی فێربوونە بەکاری بهێنیت بۆ ئەوەی کاریگەری ئەرێنی لەسەر ژیان و تەکنەلۆژیا ی زانیاری دروست بکەن.
توانای تێپەڕاندنی ئاستەنگەکانت بەڵگەیە لەسەر هێز و ئیرادەت.
لەگەڵ هەنگاونان بۆ قۆناغی داهاتووی ژیانتان ، هیوای سەرکەوتن بۆ هەوڵەکانی داهاتووتان دەخوازین. هیوادارین بەردەوام بن لە فێربوون و گەشەکردن و بەدەستهێنانی بڕوانامەی بەرزتر . جارێکی تر پیرۆزبایی ئەم دەرچوونەتان لێدەکەین و جێگای دەست خۆشیە و هەردەم سەرکەوتووبن.
